Одоогоос яг 20 жилийн өмнө олон нам оролцсон анхны ардчилсан сонгууль Монгол Улсад болж байв. Монголчууд анх удаа нам, төрийнхөө үйл ажиллагааг эсэргүүцэж, Улс төрийн товчоогоо огцрохыг шаардаж, шинэ нам, хөдөлгөөн олноор байгуулагдаж байв.
Анхны сөрөг хүчин нь Монголын ардчилсан нам болж, 1990 оны хоёрдугаар сарын 17-нд УДШ-ээс батламжаа авсан юм. 1990 оны долдугаар сарын 22-нд Ардын Их Хурлын депутат сонгох сонгуульд МАХН, МоАН, МҮДН, МСДН, МНН, МЧХН 430 тойрогт, 2413 нэр дэвшигчээ өрсөлдүүлжээ. Анхны ардчилсан сонгуульд оролцсон намууд 1990 оны тавдугаар сарын 20-25-нд Улсын дээд шүүхэд бүртгүүлж байсан аж.
Тэр АИХ-аас БНМАУ-ын Үндсэн хуулийн нэмэлтийн тухай хуульд өөрчлөлт оруулах тухай хуулийг баталснаар Монголын анхны ардчилсан Үндсэн хуулийг тунхаглаж, АИХ-аас байгуулсан Байнгын ажиллагаатай Парламент буюу 53 гишүүнтэй Улсын Бага Хурал 1990 оны есдүгээр сарын 13-нд анхдугаар чуулганаа хийжээ.
Олон нам оролцсон анхны чөлөөт сонгуулийн 20 жилийн ойг өчигдөр ёслол төгөлдөр тэмдэглэлээ.
Баярын хурлын үеэр Ардчилсан намын дарга Н.Алтанхуяг хэлэхдээ “Олон нам оролцсон анхны чөлөөт ардчилсан сонгууль бол Монгол Улс дэлхийн чихнээ ардчилсан орон гэдгээ тунхагласан баярын өдөр байсан юм” хэмээн онцлон тэмдэглэв.
Г.Энх
Уншигчдын сэтгэгдэл